Schnitzelbänng Zeedel: “Mer stellen is vor”
Us gegäbenem Aalass hämmer welle
e Bitzli meh über uns verzelle
Nur isch die Wärbig meistens drogge
und haut ein sälte us de Sogge
E sone Zeedel uf em Tisch,
hämmer dänggt, das wär no früsch
Wel, wenn de Politik willsch mache
isch s guet, kasch über di sälber lache
Wär schön, de nimmsch dr e kli Zyt
und lachsch mit unsrem Zeedel mit
Dr Feele Berchten ziehts alsbald
in d Ermitage, drno in Wald
Doch au im Gmeindrot isch är gärn
Mer hoffe, är wel nid gli uf Bärn
Felix Berchten, Gemeinderat (bisher)
Dr Hartmut, he, isch widr do
diräkt us Ziiri, he, nach Arlese ko
Extra für dr frei Gmeindrotplatz
Hartmut, du bisch halt e Schatz!
Hartmut Vetter, Gemeinderat (neu)
Dr Thomas isch e super Typ
e bitzli rund, abr trotzdäm fit
Är kunnt gut drus bi Stüüre und Zahle
und wet widr in d GeKo nach de Wahle
Thomas Arnet, Gemeindekommission (bisher)
D Nicole het e prima Lache
bietet in Physiotherapie und andere Sache
ihr Wüsse und ihri Kompetänze a
Die wämmer widr in dr GeKo ha!
Nicole Barthe Seelig, Gemeindekommission (bisher)
Dr Flurin dä isch lang und dünn
und het die Biodiversidät im Sinn
Duet sich in dr GeKo drfür engagiere
und in Ziiri drüber doktoriere
Flurin Leugger, Gemeindekommission (bisher)
Dr Noah stigt in d Polit-7-Meile-Schlappe
Die het er gerbt, vo sim Bappe
Ob Zanolari oder Zeller
mit so eim lüchtet d GeKo heller!
Noah Zanolari, Gemeindekommission (neu)
D Antoinette, no Pannevis,
isch meh als bi-lingue, das isch gwüss
Si luegt as Mensche sich verstöhn
öbbis wo mer gärn in dr GeKo sehn
Antoinette Pannevis, Gemeindekommission (neu)
Dr Silvan isch Co-Presidänt,
vo dr WG-Wolfmatte, und wel das nid längt
kandidiert er no für d Gmeindskommission
Das würd er mache, ohni Lohn!
Silvan Thommen, Gemeindekommission (neu)
D Selina die nimmts ganz genau
Isch e Flotti und bi dr Staatsawaltschaft au
Si weiss was richtig isch, was lätz
Jä los, in dr GeKo hets no Plätz!
Selina Weiligmann, Gemeindekommission (neu)
Dr Heinz dä isch scho pensioniert
und noch wie vor sehr engagiert
Jede Mäntig kasch mit ihm go turne
und Aafang März für ihn an d Urne
Heinz Heller, Gemeindekommission (neu)
D Catherine, uf em Plakat eher hinde
kasch meistens uf em Velo finde
Si isch e gselligi, kauft gärn lokal
und wär für d GeKo phänomenal
Catherine Stöckli, Gemeindekommission (neu)
Dr Beat, Doppelname Feig Stöckli,
kümmeret sich um Veloglöggli,
Schaltige, Brämse und Ventil
Är in dr GeKo, das wärs Ziel
Beat Feig Stöckli, Gemeindekommission (neu)
D Barbara, gsesch uf em Plakat,
isch kli schreg, abr voll parat
und ganz vorne mitdrby
Si wet au in dr GeKo si
Barbara Wenk, Gemeindekommission (neu)
Dr Hanspeter het e Namensbrueder
in Ziiri, bi dr FDP am Rueder
Unsre will weder nach Ziiri no nach Bärn
E Platz in dr GeKo hätt er gärn
Hanspeter Portmann, Gemeindekommission (neu)
D Julia Seelig die kasch gseh
schutte bim FC Arlese
und uf em Plakat links usse, grad bim Rahme
Si wär e patänti GeKo Dame
Julia Seelig, Gemeindekommission (neu)
Dr Simon schafft in dr Verwaltig
Isch jung bliibe, het e feyni Haltig
D GeKo duet er au scho kenne
Gärn schigge mer ihn drum ins Renne
Simon Rolli, Gemeindekommission (neu, von 2006–2010)
Und denne no d Antonia Sutter
Schücht weder Räge, Schnee no Pflutter
Mischt flissig in dr Pfadi mit
Si in dr GeKo wär dr Hit!
Antonia Sutter, Gemeindekommission (neu)
Zwei vo uns sage mer das Joor adieu
Die griege je e Värsli meh
D Ursi Laager nimmt dr Huet
hets gärn gmacht, abr jetz isch guet
Liebi Ursi, mer liide Quale
Niemerd erklärt so guet die Zahle
wie du, bisch halt die Bescht
Mer fiire di bim Abschiidsfest
Ursula Laager, Gemeinderat (von 2012–2024)
Em Roger isch weder Angst no Bang
Die Sitzige sin eifach z lang
Är verloht si GeKo Stuehl
Ab sofort nur no Dagesschuel
Mir dangge dir für dini Zyt
und hoffe, Roger, gosch nid zwit
Roger Angst, Gemeindekommission (von 2014–2024)
D Värslischmiidi macht jetz Pause
Du kasch für uns an d Urne sause
uns unterstütze mit dinere Stimm
Das wär super, e Win-win
Für di, für mi, für Arlese
Was gits no z sage? Nur eins meh:
Es ligt is wirklig sehr am Härz
Früschluft bitte am 3. März
Für Gmeindrot und für Gmeindskommission
Vile Dangg! die nächsten Wahlen mehr davon …